zikr shabbīr se nikal aayā
ḳhuun tahrīr se nikal aayā
hai ġharībī kī fasl-e-gul ki samar
chhat ke shahtīr se nikal aayā
raqs meñ yuuñ lage mujhe jaise
jism zanjīr se nikal aayā
merī qismat to dekhiye sāhab
ḳhvāb ta.abīr se nikal aayā
le ke apnī kamān-o-teġh-o-sipar
sāya-e-pīr se nikal aayā
uzr-e-taḳhrīb-gar pas-e-parda
shauq-e-ta.amīr se nikal aayā
merī tanhā.ī bāñTne 'rāhat'
aks tasvīr se nikal aayā