mere us ke darmiyāñ jo fāsla rakkhā gayā
us ke tai karne ko bhī ik rāsta rakkhā gayā
aks kho jaa.eñ agar halkā sā kañkar bhī gire
pāniyoñ meñ ek aisā aa.inā rakkhā gayā
sab taqāze vaise puure ho ga.e insāf ke
bas faqat mahfūz merā faisla rakkhā gayā
nā-rasā.ī kī aziyyat hī rahī apnā nasīb
mil ga.ī rūheñ to jismoñ ko judā rakkhā gayā
bhar ke ā.ankhoñ meñ sulagte ḳhvāb us kī yaad ke
mujh ko sote meñ bhī 'haidar' jāgtā rakkhā gayā