dil ke ā.īne meñ nit jalva-kunāñ rahtā hai
ham ne dekhā hai tū ai shoḳh jahāñ rahtā hai
koī din ghar se na nikle hai agar vo ḳhurshīd
muntazir shaam talak ek jahāñ rahtā hai
jhaaḌ dāman ke ta.iiñ maar ke Thokar nikle
kahīñ roke se bhī vo sarv-e-ravāñ rahtā hai
gaahe maahe ai mah-e-īd idhar bhī to guzar
roz o shab bazm meñ terā hī bayāñ rahtā hai
bāvajūd-e-ki mujhe rabt-e-dilī hai us se
ye na pūchhā kabhū 'īmān' kahāñ rahtā hai