aap logoñ ke kahe par hī ukhaḌ jaate haiñ
log to jhuuT bhī sau tarah ke ghaḌ jaate haiñ
aañkh kis tarah khule merī ki maiñ jāntā huuñ
aañkh khulte hī sabhī ḳhvāb ujaḌ jaate haiñ
ġham tumhārā nahīñ jānāñ hameñ dukh apnā hai
tum bichhaḌte ho to ham ḳhud se bichhaḌ jaate haiñ
log kahte haiñ ki taqdīr aTal hotī hai
ham ne dekhā hai muqaddar bhī bigaḌ jaate haiñ
vo jo 'haidar' mire munkir the mire zikr pe ab
chauñk uThte haiñ kisī soch meñ paḌ jaate haiñ