barsoñ junūñ sahrā sahrā bhaTkātā hai
ghar meñ rahnā yūñhī nahīñ aa jaatā hai
pyaas aur dhuup ke aadī ho jaate haiñ ham
jab tak dasht kā khel samajh meñ aatā hai
aadat thī so pukār liyā tum ko varna
itne karb meñ kaun kise yaad aatā hai
maut bhī ik hal hai to masā.il kā lekin
dil ye suhulat lete hue ghabrātā hai
ik tum hī to gavāh ho mere hone ke
ā.īna to ab bhī mujhe jhuTlātā hai
uf ye sazā ye to koī insāf nahīñ
koī mujhe mujrim hī nahīñ Thahrātā hai
kaise kaise gunāh kiye haiñ ḳhvāboñ meñ
kyā ye bhī mere hī hisāb meñ aatā hai