ye chupke chupke na thamne vaalī hañsī to dekho

vo saath hai to zarā hamārī ḳhushī to dekho

bahut hasīñ raat hai magar tum to so rahe ho

nikal ke kamre se ik nazar chāñdnī to dekho

jagah jagah seel ke ye dhabbe ye sard bistar

hamāre kamre se dhuup kī be-ruḳhī to dekho

damak rahā huuñ abhī talak us ke dhyān se maiñ

bujhe hue ik ḳhayāl kī raushnī to dekho

ye āḳhirī vaqt aur ye be-hisī jahāñ kī

are mirā sard haath chhū kar koī to dekho

abhī bahut rañg haiñ jo tum ne nahīñ chhue haiñ

kabhī yahāñ aa ke gaañv kī zindagī to dekho