zindagānī se lipaT kar ḳhud ko bahlātā huuñ maiñ

ye kahānī roz apne aap dohrātā huuñ maiñ

sub.h-dam maiñ kholtā huuñ qufl jis zindān kā

din Dhale us qaid-ḳhāne meñ palaT aatā huuñ maiñ

pāTtā rahtā huuñ din bhar ik ḳhalīj-e-zāt ko

phir kisī anjān andeshe se pachhtātā huuñ maiñ

din chaḌhe auhām kī manDī meñ saudā bech kar

raat ko afkār ke bistar pe gir jaatā huuñ maiñ

oḌh letā huuñ maiñ chādar aql-o-istidlāl kī

dāstānoñ loriyoñ se ḳhud ko bahlātā huuñ maiñ

ḳhvāb meñ aksar kināre chashma-e-imkān ke

mastī-e-harf-o-suḳhan kī lai meñ chakrātā huuñ maiñ

chhoḌtā huuñ haath apnā shāhrāh-e-shauq par

manzil-e-maqsūd par phir ḳhud ko mil jaatā huuñ maiñ

jab bhī miltā huuñ ḳhud apne aap se tanhā.ī meñ

pūchhtā huuñ kyā gañvāyā aur kyā paatā huuñ maiñ

ḳhud hī kartā huuñ tirī yādeñ maiñ maazī ke sipurd

phir kahīñ se ek lamha DhūñD kar laatā huuñ maiñ

tujh meñ aksar DhūñDhtā huuñ maiñ tujhe 'āsim' magar

tū kahāñ hai kaun hai kab kis ko samjhātā huuñ maiñ