vaañ jo kuchh ka.abe meñ asrār hai allāh allāh
so mire but meñ numūdār hai allāh allāh
dair meñ ka.abe meñ maiḳhāne meñ aur masjid meñ
jalva-gar sab meñ mirā yaar hai allāh allāh
us ke har naqsh-e-qadam par kareñ āshiq sajda
but-e-kāfir kī vo raftār hai allāh allāh
husn ke us kī kiyā tūr-e-tajallī dil ko
haa.e kyā jalva-e-dīdār hai allāh allāh
na ġharaz kufr se na diin se ham ko matlab
yaar se apne sarokār hai allāh allāh
shaiḳh hai tujh ko hī inkār sanam mere se
varna har shaḳhs ko iqrār hai allāh allāh
ḳhauf kyā daġhdaġha-e-hashr se hai mujh ko 'muhib'
pīr-e-man haidar-e-karrār hai allāh allāh