jis ko dekho ḳhvāb meñ uljhā baiThā hai
apne hī pāyāb meñ uljhā baiThā hai
aañsū aañsū jis ne dariyā paar kiye
qatra qatra aab meñ uljhā baiThā hai
bhuul ke jauharī apne la.al-o-javāhar ko
shauq-e-dur-e-nāyāb meñ uljhā baiThā hai
vo jo bagūlā ban kar uḌtā phirtā thā
dhāgā dhāgā sarāb meñ uljhā baiThā hai
nisf nahār pe yuuñ lagtā hai sūraj bhī
vaqt kī āb-o-tāb meñ uljhā baiThā hai
yād-e-kitāb-e-shauq na hogī ḳhatm kabhī
insāñ ik ik baab meñ uljhā baiThā hai