supurdagī kā valvala jamāl meñ nahīñ milā
mujhe fusūn-e-be-ḳhudī visāl meñ nahīñ milā
jo aa.ine se kirchiyoñ ke darmiyāñ kā thā safar
shikast-e-zāt kī kisī misāl meñ nahīñ milā
alam-nasīb shaam meñ hai mehr-e-jāñ bujhā bujhā
nashāt-e-rañj bhī mujhe ma.aal meñ nahīñ milā
hazār yāsmīn mushk-bū huuñ tere qurb meñ
chaman kā aks tere ḳhadd-o-ḳhāl meñ nahīñ milā
vo sar-burīda chāñd bhī ġhurūb ho gayā magar
sitāra-e-sahar shab-e-zavāl meñ nahīñ milā
'nadīm' har qadam pe dard-e-be-amāñ kā dar khulā
sukūn is jahān-e-be-misāl meñ nahīñ milā