Kamran Nadeem

raat ko pahlu mein ek taswir raushan ho gai

Kamran Nadeem

raat ko pahlū meñ ik tasvīr raushan ho ga.ī

ḳhvāb to dekhā nahīñ ta.abīr raushan ho ga.ī

us but-e-kāfir ko jo dekhā bahut nazdīk se

naqsh-gar shoḳhi-e-tahrīr raushan ho ga.ī

dasht-e-vahshat meñ ġhubār-e-nāqa-e-lailā to hai

hasrat ai pā-e-junūñ zanjīr raushan ho ga.ī

zaḳhm-e-naumīdī charāġhāñ kar rahe haiñ ziist meñ

daaġh kyā raushan hue taqdīr raushan ho ga.ī

us āñkhoñ meñ umaD aayā sitāroñ hujūm

gul-kade meñ shauq tanvīr raushan ho ga.ī

ārzūeñ sab shikasta ḳhvāb saare munhadim

mere ghar meñ raunaq-e-ta.amīr raushan ho ga.ī

sāz-e-dil-dārī pe naġhma-zan huī shām-e-visāl

mauj-e-gul ḳhūbī-e-taqrīr raushan ho ga.ī

raqs farmāne lage sab ranj-o-ġham soz-o-alam

sham-e-mīnā jal uThī tāsīr raushan ho ga.ī

umr-e-zindāñ meñ guzārī par 'nadīm' itnā to hai

mash.al-e-ḳhurshīd se zanjīr raushan ho ga.ī

Top Urdushayar.com