javāb chīḳh uThe haiñ savāl chīḳh uThe
kahīñ pe lafz kahīñ par ḳhayāl chīḳh uThe
dikhā ye ḳhvāb ki kal raat mar gayā huuñ maiñ
gunāh jitne the sab hasb-e-hāl chīḳh uThe
kahīñ imaam kahīñ muqtadī mile jāhil
azāneñ sun ke hamārī bilāl chīḳh uThe
phisal ga.ī mirī muTThī se zindagī kī ret
ghaḌī se haare jo lamhe to saal chīḳh uThe
banā ke apnī hī tasvīr ḳhud pashemāñ huuñ
jo rañg maiñ ne bhare sabz laal chīḳh uThe