kaTī patañg huuñ maiñ aur be-sahārā huuñ

mujhe kahā nahīñ us ne ki maiñ tumhārā huuñ

ye mujh meñ ātish-e-be-soz jaltī rahtī hai

maiñ raushnī huuñ maiñ jugnū huuñ isti.āra huuñ

tire husūl kī gardish meñ kho ga.ī huuñ maiñ

mujhe batā ki maiñ zarra huuñ yā sitārā huuñ

maiñ ek qatra-e-shabnam huuñ dīda-var ke liye

jo kaj-nigāh haiñ un ke liye sharāra huuñ

maiñ ek umr se buntī huuñ ḳhvāb chāhat ke

hisār-e-dīda-e-nam-nāk meñ ḳhasāra huuñ