daa.im sarāb ik mire andar hai kyā karūñ
sahrā mirī nazar meñ samundar hai kyā karūñ
dekhe jo merī nekī ko shak kī nigāh se
vo aadmī bhī to mire andar hai kyā karūñ
yak-gūna be-ḳhudī ko hī ab DhūñDhtā hai dil
ġham aur ḳhushī kā bojh barābar hai kyā karūñ
achchhā to hai ki sab se milūñ ek hī tarah
lekin vo aur logoñ se behtar hai kyā karūñ
milte haiñ yuuñ to log ba-zāhir bahut gale
har āstīn meñ koī ḳhanjar hai kyā karūñ