vo paas rah ke bhī mujh meñ samā nahīñ saktā
vo muddatoñ na mile duur jā nahīñ saktā
vo ek yaad jo dil se miTī nahīñ ab tak
vo ek naam jo hoñToñ pe aa nahīñ saktā
vo ik hañsī jo khanaktī hai ab bhī kānoñ meñ
vo ik latīfa jo ab yaad aa nahīñ saktā
vo ek ḳhvāb jo phir lauT kar nahīñ aayā
vo ik ḳhayāl jise maiñ bhulā nahīñ saktā
vo ek sher jo maiñ ne kahā nahīñ ab tak
vo ek raaz jise maiñ chhupā nahīñ saktā