ye alag baat ki vo mujh se ḳhafā rahtā hai
maiñ ik insān huuñ aur mujh meñ ḳhudā rahtā hai
merī bātoñ meñ bahut us kī jhalak aatī hai
us ke lahje meñ mirā zehn basā rahtā hai
qaid meñ us se bahādur na koī dekhā thā
ab jo āzād hai thoḌā sā Darā rahtā hai
aur logoñ kī nigāhoñ meñ burā ho lekin
apnī nazroñ meñ bhī gir jaa.e to kyā rahtā hai
pul se guzre to nadī dhyān se dekhī ham ne
varna manzar ye nigāhoñ se chhupā rahtā hai