raqs-e-junūñ kī garmī-e-tāsīr dekhnā

khultā hai kaise halqa-e-zanjīr dekhnā

ghis ghis ke pattharoñ ko banāyā hai aa.ina

dekheñ vo ḳhvāb ham ko hai ta.abīr dekhnā

harbe sab un ke un ko hī lauTā diye ga.e

hairat se ban ga.e haiñ vo tasvīr dekhnā

likh dī zabān-e-zaḳhm meñ rūdād-e-zindagī

jismoñ pe us kī shoḳhi-e-tahrīr dekhnā

ab to vajūd-e-maqtal-o-zindāñ pe aa banī

ab beḌiyāñ na tauq na zanjīr dekhnā

dekhe haiñ baiThe baiThe muqaddar ke tum ne khel

uTh kar zarā karishma-e-tadbīr dekhnā

qasr-e-hayāt-e-nau kī hai bārūd par binā

'anjum' ye pā.edārī-e-ta.amīr dekhnā