dīvār par likhā na paḌho aur ḳhush raho
kahtā hai jo gajar na suno aur ḳhush raho
apnā.iyat kā ḳhvāb to dekho tamām umr
begānagī kā zahr piyo aur ḳhush raho
kāñTe jo dostoñ ne bikhere haiñ raah meñ
palkoñ se apnī aap chuno aur ḳhush raho
bāteñ tamām un kī suno gosh-e-hosh se
apnī taraf se kuchh na kaho aur ḳhush raho
vo kaj-adā haiñ gar to na shikva karo kabhī
behtar hai zahr-e-ishq piyo aur ḳhush raho
shikva kiyā zamāne kā to us ne ye kahā
jis haal meñ ho zinda raho aur ḳhush raho
'anvar-sadīd' haal agar mehrbāñ nahīñ
maazī ko apne yaad karo aur ḳhush raho