sharāb Dhaltī hai shīshe meñ phuul khilte haiñ
chale bhī aao ki ab donoñ vaqt milte haiñ
jo ho sake to gale mil ke ro le ai ġham-ḳhvār
ki āñsuoñ hī se dāman ke chaak silte haiñ
ye aur baat kahānī sī koī ban jaa.e
harīm-e-nāz ke parde havā se hilte haiñ
mire lahū se mo.attar tire laboñ ke gulāb
tirī vafā se kañval mere dil ke khilte haiñ
dhaḌak rahā hai masarrat se kā.enāt kā dil
kabhī ke bichhḌe hue dost aaj milte haiñ