nashāt-e-zindagī meñ Duub kar aañsū nikalte haiñ
sunā hai ab tire ġham ke na.e pahlū nikalte haiñ
mohabbat kā chaman hai aao sair-e-sarsarī kar leñ
yahāñ se le ke sab TuuTe hue baazū nikalte haiñ
junūñ le ke chalā hai pā-ba-jaulāñ us ke kūche se
liye āġhosh meñ ham nik.hat-e-gesū nikalte haiñ
tirī bastī meñ dīvānoñ ko rusvā.ī hī raas aa.ī
ye apnā chaak dāman le ke ab har sū nikalte haiñ
vahī aariz vahī kākul vahī kāfir-adā āñkheñ
magar har lamha phir bhī kuchh na.e jaadū nikalte haiñ