sar-kashī ko jab ham ne ham-rikāb rakhnā hai

TūTne bikharne kā kyā hisāb rakhnā hai

ek ek saa.at meñ zindagī samonī hai

ek ek jazbe meñ inqalāb rakhnā hai

raat ke añdheroñ se jañg karne vāloñ ne

sub.h kī hathelī par āftāb rakhnā hai

ham pe us se vājib haiñ koshisheñ baġhāvat kī

tum ne jis qabīle ko kāmyāb rakhnā hai

rakh do ham faqīroñ kī is kushāda jholī meñ

apnī bādshāhī kā jo azaab rakhnā hai

tum to ḳhud zamāne meñ jabr kī alāmat ho

tum ne jabr kyā zer-e-ehtisāb rakhnā hai

shahr-e-be-amāñ ham ne naqd-e-jāñ luTā kar bhī

tere har darīche par kal kā ḳhvāb rakhnā hai