ab kyā batā.ūñ shahr ye kaisā lagā mujhe
har shaḳhs apne ḳhuun kā pyāsā lagā mujhe
ḳhafgī ho yā jafā.eñ hoñ yā mehrbāniyāñ
har rañg chashm-e-nāz kā achchhā lagā mujhe
dekhā jo ġhaur se to vo jhoñkā havā kā thā
tum ḳhud hī chham se aa.ī ho aisā lagā mujhe
vo shaḳhs jis se pahle kabhī āshnā na thā
nazdīk se jo dekhā to apnā lagā mujhe
yuuñ bhī milegī manzil-e-jānāñ yaqīñ na thā
vo sāmne the phir bhī ik sapnā lagā mujhe