bad-zan haiñ ahl-e-ka.aba mujh dair-āshnā se
kahte haiñ mujh ko kāfir fariyād hai ḳhudā se
bedād mohtasib kī fariyād hai ḳhudā se
barse sharāb ghar ghar mai-ḳhvār kī duā se
chitvan badal rahī hai naam aa gayā vafā kā
tevar bigaḌ rahe haiñ afsāna-e-vafā se
ham kyuuñ tumheñ batā.eñ ham kyuuñ tumheñ jatā.eñ
roz-e-jazā na jaane māñgeñge kyā ḳhudā se
vo pūchhte haiñ mujh se kaise ho tum 'mubārak'
maiñ kah rahā huuñ achchhā sarkār kī duā se