yaqīn hai ki vo merī zabāñ samajhtā hai
magar zabāñ ke ishāre kahāñ samajhtā hai
farāz-e-dār ko jo āsmāñ samajhtā hai
use bhī kab ye alū-e-makāñ samajhtā hai
use patā hai ki ruktī nahīñ hai chhāñv kabhī
to phir vo abr ko kyuuñ sā.ebāñ samajhtā hai
tilism-e-ḳhvāb huā paash paash kab kā magar
haqīqatoñ ko vo parchhā.iyāñ samajhtā hai
use ye rishta-e-āb-o-sarāb lā-yānī
ki vo zuhūr o ḳhifā kī zabāñ samajhtā hai
ye dil kī aag bujhī hai ki sham-e-jāñ huī gul
jo 'mīr' parda-e-shab ko dhuāñ samajhtā hai
tamām lafz khaḌe chīḳhte haiñ aur 'salīm'
ḳhamoshiyoñ ko vafūr-e-bayāñ samajhtā hai