jo salīb-e-shab pe gūñje vo sadā kahiye mujhe

ye sitam kaisā ki sāz-e-be-navā kahiye mujhe

be-karāñ vus.at meñ huuñ maiñ TūTte tāroñ kī chīḳh

haañ kisī darmāñda rah-rav kī duā kahiye mujhe

merā har shīrāza barham ho gayā lamhoñ ke saath

muntashir aurāq kā ik silsila kahiye mujhe

sub.h se ab tak rahā maiñ saath us ke lekin ab

shaam ke jañgal meñ gum hotā huā kahiye mujhe

'nāz' maiñ bhī ātishīñ jazbāt rakhtā thā kabhī

ab ḳhunuk rātoñ kī barfīlī havā kahiye mujhe