vafā-e-vāda nahīñ vāda-e-digar bhī nahīñ
vo mujh se rūThe to the lekin is qadar bhī nahīñ
baras rahī hai harīm-e-havas meñ daulat-e-husn
gadā-e-ishq ke kaase meñ ik nazar bhī nahīñ
na jaane kis liye ummīd-vār baiThā huuñ
ik aisī raah pe jo terī rahguzar bhī nahīñ
nigāh-e-shauq sar-e-bazm be-hijāb na ho
vo be-ḳhabar hī sahī itne be-ḳhabar bhī nahīñ
ye ahd-e-tark-e-mohabbat hai kis liye āḳhir
sukūn-e-qalb udhar bhī nahīñ idhar bhī nahīñ