ka.ī baar is kā dāman bhar diyā husn-e-do-ālam se

magar dil hai ki is kī ḳhāna-vīrānī nahīñ jaatī

ka.ī baar is kī ḳhātir zarre zarre kā jigar cherā

magar ye chashm-e-hairāñ jis kī hairānī nahīñ jaatī

nahīñ jaatī matā-e-lāl-o-gauhar kī girāñ-yābī

matā-e-ġhairat-o-īmāñ kī arzānī nahīñ jaatī

mirī chashm-e-tan-āsāñ ko basīrat mil ga.ī jab se

bahut jaanī huī sūrat bhī pahchānī nahīñ jaatī

sar-e-ḳhusrau se nāz-e-kaj-kulāhī chhin bhī jaatā hai

kulāh-e-khusravī se bū-e-sultānī nahīñ jaatī

ba-juz dīvāngī vaañ aur chāra hī kaho kyā hai

jahāñ aql o ḳhirad kī ek bhī maanī nahīñ jaatī