jis ko lagtā hai gum-shuda huuñ maiñ
jaan le mujh ko zalzala huuñ meñ
maiñ bachātī huuñ bad-duāoñ se
maañ kī bhejī huī duā huuñ maiñ
kho gayā jo ghane añdheroñ meñ
us ujāle kā rāsta huuñ maiñ
mujh ko pahchān mere naaz uThā
terā apnoñ se rābta huuñ maiñ
nafratoñ ne diye haiñ jo tum ko
aise har dard kī davā huuñ maiñ
vaqt se haar kar na baiTh mujhe
phir bulā le tirī adā huuñ maiñ
maiñ sukūñ huuñ ḳhushī bhī huuñ 'sarhad'
kaun kahtā hai ġham-zada huuñ maiñ