pūchhte ho mire ash.ār meñ kyā rakkhā hai
ek mahshar hai ki lafzoñ meñ chhupā rakkhā hai
muddateñ ho ga.iiñ dekhe hue ā.īna hameñ
ek tasvīr kī tasvīr meñ kyā rakkhā hai
vahī badle hue tevar vahī kal kā va.ada
is liye ham ne tirā naam ḳhudā rakkhā hai
aaj tak nāḳhun-e-fitrat haiñ lahū se rañgīñ
merī taḳhlīq se hāthoñ ko sajā rakkhā hai
aur kuchh ho ki na ho ghar meñ ujālā to rahe
ik diyā ham ne umīdoñ kā jalā rakkhā hai