achchhī-ḳhāsī rusvā.ī kā sabab hotī hai

dūsrī aurat pahlī jaisī kab hotī hai

kuchh mafhūm samajh kar āñkheñ bol uTThīñ

sargoshī to yūñhī zer-e-lab hotī hai

koī masīhā shāyad us ko chhū guzrā

dil ke andar itnī raushnī kab hotī hai

taare TuuT ke dāman meñ gir jaate haiñ

jab mehmān yahāñ ik duḳhtar-e-shab hotī hai

ik be-dāġh dupaTTe meñ pākīza nuur

kitnī ujlī us kī namāz meñ chhab hotī hai

girī paḌī dekhī hai saḌak par tanhā.ī

pichhle pahar ko shahr kī niiñd ajab hotī hai

aksar maiñ ne qabristān meñ ġhaur kiyā

apnī miTTī apne haath meñ kab hotī hai

ab lagtā hai ik dil bhī hai siine meñ

pahle kuchh taklīf nahīñ thī ab hotī hai

ishq kiyā to apnī hī nādānī thī

varna duniyā jaan kī dushman kab hotī hai

qadam qadam par ham ne aap se nafrat kī

aisī mohabbat dil meñ kisī ke kab hotī hai

jaise ik jannat kī ne.amat mil jaa.e

mere liye to ghar kī fazā hī sab hotī hai

Dūbne vaalā phir uupar aa jaatā hai

kabhī kabhī dariyā kī mauj ġhazab hotī hai

rashk se merā chehra taktī hai duniyā

jaan kī dushman us kī surḳhī-e-lab hotī hai