baḳhsh de kuchh to e'tibār mujhe
pyaar se dekh chashm-e-yār mujhe
raat bhī chāñd bhī samundar bhī
mil ga.e kitne ġham-gusār mujhe
raushnī aur kuchh baḌhā jā.ūñ
soz-e-ġham aur bhī nikhār mujhe
kuchh hī din meñ bahār aa jaatī
aur karnā thā intizār mujhe
dekh duniyā ye paiñtare na badal
dekh shīshe meñ mat utaar mujhe
ā.īne meñ nazar nahīñ aatā
apnā chehra kabhī-kabhār mujhe
kis qadar shoḳh ho ke taktā thā
raat band-e-qabā-e-yār mujhe
dekh maiñ sā.at-e-masarrat huuñ
itnī ujlat se mat guzār mujhe
markab-e-ḳhāk par savār huuñ maiñ
dekh ai shahr-e-zar-nigār mujhe
rizq-e-maqsūm khā ke jiinā thā
khā ga.ī fikr-e-rozgār mujhe