ishq jhelā hai to chehra zard honā chāhiye
husn ke shaidā.iyoñ ko mard honā chāhiye
bad-gumānī poñchh kar āñchal se koī chuum le
is liye tasvīr par kuchh gard honā chāhiye
sach kaho to har kahānī dāstān apnī hī hai
aadmī ke dil meñ thoḌā dard honā chāhiye
aaj ke bosoñ meñ sachchā.ī kī surḳhī hai kahāñ
ai musavvir in laboñ ko zard honā chāhiye
is makāñ meñ rahne vaale murda-dil insān haiñ
is mahal ke pattharoñ ko sard honā chāhiye
ek jaise chehre-mohre ek jaisī niyyateñ
bhiiḌ meñ sab se alag ik fard honā chāhiye
maañ kā āñchal thaam kar ronā bahut āsān hai
duur rah kar rone vaalā mard honā chāhiye