ye mo.ajiza bhī kisī roz kar hī jaanā hai
tire ḳhayāl se ik din guzar hī jaanā hai
na jaane kis liye lamhoñ kā bojh Dhote haiñ
ye jānte haiñ ki ik din to mar hī jaanā hai
vo kah rahā thā nibhā.egā pyaar kī rasmeñ
maiñ jāntā thā ki us ne mukar hī jaanā hai
havā-e-shām kahāñ le chalī zamāne ko
zarā Thahar ki hameñ bhī udhar hī jaanā hai
maiñ ḳhvāb dekhtā huuñ aur sher kahtā huuñ
hunar-varoñ ne ise bhī hunar hī jaanā hai