vo biij koī batā de kahāñ se laanā hai
mujhe to baaġh mohabbat kā ik ugānā hai
vo jis ke phuul bikhereñ fazā meñ pyaar hī pyaar
har ek phuul ko ghar ghar meñ le ke jaanā hai
zamīn vāloñ pe kaisā ye vaqt aayā hai
ki āsmān bhī hairāñ hai kyā zamāna hai
ham apnī baat ḳhud apne hī dil se kah leñge
ye baat baat pe ehsān kyā uThānā hai
phir un kā jurm hamāre hisāb meñ aayā
ilāhī aur hameñ kitnā āzmānā hai
unheñ bhī da.avā-e-bechārgī bahut hai magar
hameñ bhī aaj unheñ aa.ina dikhānā hai
mirā adū mire qadmoñ meñ Dher ho jaatā
ye mo.ajiza mire mālik tujhe dikhānā hai