husn se rasm-o-rāh hone do

zindagī ko tabāh hone do

us kī rahmat kī raah hone do

fard-e-isyāñ siyāh hone do

manzil-e-husn ḳhud qadam legī

ishq ko rad-ba-rāh hone do

us kī rahmat kā aasrā hai mujhe

mujh se sarzad gunāh hone do

charḳh par bijliyāñ sī taḌpeñgī

un ko garm nigāh hone do

merā zimma agar davā na bane

dard ko be-panāh hone do

fitrat-e-ishq hai yahī 'jauhar'

dīn-o-duniyā tabāh hone do