maiñ ne kahā ki tajziya-e-jism-o-jāñ karo

us ne kahā ye baat supurd-e-butāñ karo

maiñ ne kahā ki bahār-e-abad kā koī surāġh

us ne kahā ta.āqub-e-lāla-e-ruḳhāñ karo

maiñ ne kahā ki sarf-e-dil-e-rā.egāñ hai kyā

us ne kahā ārzū-e-rā.egāñ karo

maiñ ne kahā ki ishq meñ bhī ab mazā nahīñ

us ne kahā ki az-sar-e-nau imtihāñ karo

maiñ ne kahā ki aur koī pand-e-ḳhush-gavār

us ne kahā ki ḳhidmat-e-pīr-e-muġhāñ karo

maiñ ne kahā ham se zamāna hai sar-garāñ

us ne kahā ki aur ise sar-garāñ karo

maiñ ne kahā ki zohd sarāsar fareb hai

us ne kahā ye baat yahāñ kam bayāñ karo

maiñ ne kahā ki hadd-e-adab meñ nahīñ 'zafar'

us ne kahā na band kisī kī zabāñ karo