baġhair sāġhar o yār-e-javāñ nahīñ guzre
hamārī umr ke din rā.egāñ nahīñ guzre
hujūm-e-gul meñ rahe ham hazār dast darāz
sabā-nafas the kisī par girāñ nahīñ guzre
numūd un kī bhī daur-e-subū meñ thī kal raat
abhī jo daur-e-tah-e-āsmāñ nahīñ guzre
nuqūsh-e-pā se hamāre uge haiñ laala o gul
rah-e-bahār se ham be-nishāñ nahīñ guzre
ġhalat hai ham-nafaso un kā zindagī meñ shumār
jo din ba-ḳhidmat-e-pīr-e-muġhāñ nahīñ guzre
'zafar' kā mashrab-e-rindī hai ik jahāñ se alag
mirī nigāh se aise javāñ nahīñ guzre