hijr kī bhīgī huī raat udāsī aur maiñ
aaj phir ro.e haiñ barsāt udāsī aur maiñ
ho ke majbūr kiyā us ko havāle us ke
aise aa.e haiñ mire haat udāsī aur maiñ
chand aañsū mirī āñkhoñ se nikal aate haiñ
jab bhī karte haiñ tirī baat udāsī aur maiñ
baiTh jaate haiñ tirī yaad liye terrace par
roz karte haiñ mulāqāt udāsī aur maiñ
jab koī aur mayassar nahīñ hotā mujh ko
tab bhī hote haiñ mire saath udāsī aur maiñ