tum duur ho to pyaar kā mausam na aa.egā
ab ke baras bahār kā mausam na aa.egā
chūmūñgā kis kī zulf ghaTāoñ ko dekh kar
ik jurm-e-ḳhush-gavār kā mausam na aa.egā
chhalke sharāb barq gire yā jaleñ charāġh
zikr-e-nigāh-e-yār kā mausam na aa.egā
vāda-ḳhilāfiyoñ ko taras jā.egā yaqīñ
rātoñ ko intizār kā mausam na aa.egā
tujh se bichhaḌ ke zindagī ho jā.egī tavīl
ehsās ke nikhār kā mausam na aa.egā