do-jahāñ se māvarā ho jā.egā
jo tire ġham meñ fanā ho jā.egā
dard jab dil se judā ho jā.egā
sāz-e-hastī be-sadā ho jā.egā
dekhiye ahd-e-vafā achchhā nahīñ
marnā jiinā saath kā ho jā.egā
be-natīja hai ḳhayāl-e-tark-e-rāh
phir kisī din sāmnā ho jā.egā
ab Thahar jā yād-e-jānāñ ro to luuñ
farz-e-tanhā.ī adā ho jā.egā
lahza lahza rakh ḳhayāl-e-husn-e-dost
lamha lamha kaam kā ho jā.egā
zauq-e-azm-e-bā-amal darkār hai
aag meñ bhī rāsta ho jā.egā
apnī jānib jab nazar uTh jā.egī
zarra zarra ā.īna ho jā.egā