maiñ udaas huuñ mire mehrbāñ maiñ udaas huuñ
tū kahīñ nahīñ hai tū hai kahāñ maiñ udaas huuñ
mirā shahr-e-ḳhvāb to reza reza bikhar chukā
kahīñ kho ga.ī mirī kahkashāñ maiñ udaas huuñ
mujhe apne qadmoñ kī ḳhaak meñ hī panāh de
mere paas kuchh bhī nahīñ hai maañ maiñ udaas huuñ
ye jo jañg hai kisī aur vaqt pe Taal deñ
saf-e-dostāñ saf-e-dushmanāñ maiñ udaas huuñ
tumheñ umr bhar kā hai tajraba koī mashvara
koī mashvara ai shikastagāñ maiñ udaas huuñ
maiñ ajiib huuñ nahīñ muḳhtalif haañ ajiib huuñ
vahāñ saarā shahr hai ḳhush jahāñ maiñ udaas huuñ