zabāñ kaTī so kaTī bahs muḳhtasar to huī
jo baat maiñ ne kahī thī vo mo'atabar to huī
ye din to raat meñ Dhaltā nazar nahīñ aatā
bhalī thī shab ki guzar to ga.ī sahar to huī
girī fasīl jo zindāñ kī sar bahut phūTe
machā to shor magar ḳhalq ko ḳhabar to huī
muqāble meñ udhar teġh thī idhar gardan
maiñ suraḳh-rū huuñ ki tafrīq-e-ḳhair-o-shar to huī
harīf ho ga.e qurbāñ matā.a-e-duniyā par
unheñ bhī jaañ se koī shai azīz-tar to huī