āñkhoñ meñ mirī phirtī hai tasvīr kisī kī
tasvīr meñ huuñ merī hai tasvīr kisī kī
but apne hī ko kahte haiñ sab ahl-e-tasavvuf
tasvīr-e-butāñ hotī hai tasvīr kisī kī
hai pesh-o-aqab dil ke mire aur chap-o-rāst
har lahza miyāñ phirtī hai tasvīr kisī kī
hastī hai kahīñ aur na bastī hai kisī kī
dekhā to yahī hastī hai tasvīr kisī kī
tasvīr mirī mere musavvir kī hai 'mardāñ'
har-dam ye sadā detī hai tasvīr kisī kī