tarī talāsh meñ har rahnumā se bāteñ kiiñ
ḳhalā se rabt baḌhāyā havā se bāteñ kiiñ
kabhī sitāroñ ne bhejā hameñ koī paiġhām
to muddatoñ meñ kisī āshnā se bāteñ kiiñ
hamārī ḳhair manāo ki aaj ḳhud us ne
baḌe ḳhulūs baḌī iltijā se bāteñ kiiñ
gunāh-gār to ramz-e-harīm tak pahuñche
savāb vāloñ ne bāñg-e-darā se bāteñ kiiñ
bahut se vo the jinhoñ ne butoñ se faiz uThā.e
bahut se vo the jinhoñ ne ḳhudā se bāteñ kiiñ
na jaane kab se sunāte the us ko ham ahvāl
nazar uThā.ī to phir ibtidā se bāteñ kiiñ
hazār sher kahe yuuñ to kahne vāloñ ne
kisī kisī ne dil-e-mubtalā se bāteñ kiiñ