tujh se mahv-e-guftugū honā paḌā

maiñ se hijrat kar ke tū honā paḌā

maiñ abhī jī-bhar ke jī paayā na thā

maut tere rū-ba-rū honā paḌā

maiñ pareshānī meñ ghirTā thā kabhī

aur hairāñ bhī kabhū honā paḌā

merī hasrat thī kabhī tū māh-vash

mujh ko terī aarzū honā paḌā

sāmne lashkar thā jo vo haq pe thā

haq pe mujh ko ai adū honā paḌā

tujh se miltā-jultā honā chāhā thā

ho gayā to hū-ba-hū honā paḌā