rishta-e-dam se jaan hai tan meñ
manke manke se tere simran meñ
dīda-e-dil se dekhtā huuñ tujhe
sochtā huuñ jab apne maiñ man meñ
gul hai shabnam se aah dīda-e-tar
bin vo gul-rū ke sub.h-e-gulshan meñ
karbalā ke bagūle saare kaash
ḳhaak uḌātā huā phirūñ ban meñ
gauhar-e-āb-dār ke mānind
ashk ġhaltāñ haiñ mere dāman meñ
sarv-e-gulzār sā suhātā hai
vo mirā yaar ghar ke āñgan meñ
apnī sūrat ko ai shahansha-e-husn
'ishq' ke dekh dil ke darpan meñ