ab apnī chīḳh bhī kyā apnī be zabānī kyā

mahz asīroñ kī mahsūr zindagānī kyā

ruteñ jo tū ne utārī haiñ ḳhuub hoñgī magar

babūl-sej pe sajtī hai gul-fishānī kyā

hai jism ek tazādāt ke ka.ī ḳhāne

karegā par inheñ ik rañg-e-āsmānī kyā

hazār karvaTeñ jhankār hī sunātī haiñ

yuuñ jhaTpaTāne se zanjīr hogī paanī kyā

zamīñ ke aur taqāze falak kuchh aur kahe

qalam bhī chup hai ki ab moḌ le kahānī kyā

anā to qaid kī tash.hīr se gurezāñ thī

pukār uTThī magar merī be-zabānī kyā

maiñ ḳhushk naḳhl sī jañgal tavīl tez havā

bikher degī mujhe bhī ye be-makānī kyā