kahāñ kisī pe ye ehsān karne vaalā huuñ
maiñ apne aap ko hairān karne vaalā huuñ
ajiib rañg kī ḳhushbū hai mere kiise meñ
maiñ shahr bhar ko pareshān karne vaalā huuñ
khilā rahegā kisī yaad ke jazīre par
ye baaġh maiñ jise vīrān karne vaalā huuñ
duā.eñ māñgtā huuñ sab kī zindagī ke liye
aur apnī maut kā sāmān karne vaalā huuñ
kuchh aur tarah kī mushkil meñ Dālne ke liye
maiñ apnī zindagī āsān karne vaalā huuñ