munāfiqat kā nisāb paḌh kar mohabbatoñ kī kitāb likhnā

bahut kaThin hai ḳhizāñ ke māthe pe dāstān-e-gulāb likhnā

maiñ jab chalūñgā to regzāroñ meñ ulfatoñ ke kañval khileñge

hazār tum mere rāstoñ meñ mohabbatoñ ke sarāb likhnā

firāq mausam kī chilmanoñ se visāl lamhe chamak uTheñge

udaas shāmoñ meñ kāġhaz-e-dil pe guzre vaqtoñ ke baab likhnā

vo merī ḳhvāhish kī lauh-e-tishna pe zindagī ke savāl ubharnā

vo us kā harf-e-karam se apne qubūliyat ke javāb likhnā

ga.e zamānoñ kī dard kajlā.ī bhūlī bisrī kitāb paḌh kar

jo ho sake tum se aane vaale dinoñ ke rañgīn ḳhvāb likhnā