ye jabr bhī hai bahut iḳhtiyār karte hue
guzar rahī hai tirā intizār karte hue
kalī khilī to usī ḳhush-suḳhan kī yaad aa.ī
sabā bhī ab ke chalī sogvār karte hue
tire badan ke gulistāñ kī yaad aatī hai
ḳhud apnī zaat ke sahrā ko paar karte hue
ye dil kī raah chamaktī thī aa.ine kī tarah
guzar gayā vo use bhī ġhubār karte hue
ḳhud apne haath kī haibat se kaañp jaatā huuñ
kabhī kabhī kisī dushman pe vaar karte hue